2Ch 24 | NdeIBE | STEP | UJowashi waba yinkosi eleminyaka eyisikhombisa yokuzalwa, njalo wabusa eJerusalema okweminyaka engamatshumi amane. Ibizo likanina linguZibiya owayevela eBherisheba.

2 Chronicles 24

UJowashi Ulungisa Ithempeli

1 UJowashi waba yinkosi eleminyaka eyisikhombisa yokuzalwa, njalo wabusa eJerusalema okweminyaka engamatshumi amane. Ibizo likanina linguZibiya owayevela eBherisheba. 2 UJowashi wenza ukulunga phambi kukaJehova iminyaka yonke uJehoyada engumphristi. 3 UJehoyada wamdingela abafazi ababili, wazala amadodana lamadodakazi.

4 Ngemva kwesikhathi esithile uJowashi wabona kufanele ukuthi alungise kutsha ithempeli likaJehova. 5 Wabuthanisa abaphristi labaLevi wathi kubo: “Yanini emizini yakoJuda liyeqoqa imali yomnyaka ngomnyaka kuye wonke um-Israyeli, lilungiswe kutsha ithempeli likaNkulunkulu wenu. Kwenzeni khathesi.” Kodwa abaLevi abazange bakwenze masinyane.

6 Ngakho inkosi yabiza uJehoyada umphristi omkhulu yathi kuye, “Kungani ungatshelanga abaLevi ukuba baqoqe koJuda laseJerusalema umthelo owabekwa nguMosi inceku yeNkosi kanye lasebandleni lako-Israyeli okweThente loBufakazi na?”

7 Amadodana alowaya umama oxhwalileyo u-Athaliya ayedilize ithempeli likaNkulunkulu aze azisebenzisela lezinto zalo ezingcwele kuboBhali.

8 Ngokulaya kwenkosi, kwenziwa ibhokosi labekwa phandle, esangweni lethempeli leNkosi. 9 Kwasekumenyezelwa kulo lonke elakoJuda laseJerusalema ukuba kulethwe eNkosini, umthelo owawumiswe nguMosi inceku kaNkulunkulu enkangala ukuba uzakhitshwa ngabako-Israyeli. 10 Izikhulu zonke labantu bonke baletha okwabo ngokujabula, bakufaka ebhokisini laze lagcwala. 11 Kwakusithi nxa ibhokisi lingalethwa ngabaLevi ezikhulwini zenkosi zithi zingabona ukuthi sekulemali enengi, unobhala wesigodlweni lesikhulu somphristi omkhulu bafike bathulule okwakusebhokisini babe sebelibuyisela endaweni yalo. Bakwenza lokho ngezikhathi zonke baze babuthelela imali enengi kakhulu.

12 Inkosi loJehoyada baholisa abantu ababesenza umsebenzi owawufanele wenziwe ethempelini likaJehova. Baqatsha ababazi bamatshe lababazi ukuze bakhe kutsha ithempeli likaJehova, labakhandi bezinsimbi kanye labakhandi bethusi besakha kutsha ithempeli.

13 Amadoda ayebona ngokuqhutshwa komsebenzi ayekhaliphile, njalo umsebenzi ayewukhangele waqhubeka kuhle. Lakhiwa kutsha ithempeli likaNkulunkulu labuyela esimeni salo elaliyiso njalo baliqinisa. 14 Bathe sebeqedile, baletha imali eyasalayo enkosini lakuJehoyada, benza ngayo impahla zethempeli likaJehova: izitsha zokusebenzela kanye lezeminikelo yokutshiswa, izinditshi lezinye izitsha zegolide lezesiliva. UJehoyada esaphila, iminikelo yokutshiswa yayihlezi ikhona ethempelini likaJehova.

15 UJehoyada wayeseluphele eleminyaka eminengi, wafa eleminyaka yokuzalwa elikhulu elilamatshumi amathathu. 16 Wangcwatshwa lamakhosi eMzini kaDavida ngenxa yalokho okuhle akwenza ko-Israyeli ekwenzela uNkulunkulu ethempelini lakhe.

Ububi BukaJowashi

17 Ngemva kokufa kukaJehoyada, izikhulu zakoJuda zayakhonza enkosini uJowashi, yazilalela. 18 Balidela ithempeli likaJehova, uNkulunkulu waboyise, basebekhonza izinsika zika-Ashera, lezithombe zakhe. Ngenxa yalesisimo, ulaka lukaNkulunkulu lwehlela phezu kwabakoJuda laseJerusalema. 19 Lanxa uJehova wathumela abaphrofethi ebantwini ukuba bababuyisele kuye njalo lanxa bafakaza ngokungavumelani labo, abazange babalalele.

20 Ngakho uMoya kaNkulunkulu wehlela kuZekhariya indodana yomphristi uJehoyada. Wema phambi kwabantu wathi, “Nanku okutshiwo nguNkulunkulu: ‘Kungani lingalaleli imilayo kaJehova? Aliyikuphumelela. Ngenxa yokumlahla uJehova elikwenzileyo, laye uselilahlile.’ ”

21 Kodwa bamhlamukela, kwathi ngokuqondisa kwenkosi bamkhanda bambulala ngamatshe egumeni lethempeli likaJehova.

22 INkosi uJowashi ayizange izihluphe ngomusa eyayiwenzelwe nguJehoyada uyise kaZekhariya kodwa yabulala indodana yakhe, yona yathi ekufeni kwayo, “UJehova uNkulunkulu kakubone lokhu, aphindisele.”

23 Ekupheleni komnyaka amabutho ama-Aramu ahlasela uJowashi; ahlasela koJuda laseJerusalema abulala bonke abakhokheli babantu. Impango yonke ayithumela enkosini yawo eDamaseko. 24 Kwathi loba impi yama-Aramu yayikade ize lamadoda amalutshwana, uJehova wanikela ezandleni zawo ibutho elikhulu kakhulu. Njengoba abakoJuda babemlahlile uJehova, uNkulunkulu wabokhokho babo, uJowashi wehlulelwa ngokufaneleyo. 25 Ama-Aramu athi esehlehla, atshiya uJowashi elimele kakhulu. Izikhulu zakhe zamhlamukela ngokubulala kwakhe indodana kaJehoyada umphristi, zahle zambulalela embhedeni wakhe. Ngakho wafa wayangcwatshwa eMzini kaDavida, kodwa kungasikho emathuneni amakhosi.

26 Laba abaceba ukumbulala kwakunguZabhadi, indodana kaShimeyathi owesifazana wama-Amoni loJehozabhadi, indodana kaShimrithi owesifazana wamaMowabi. 27 Imbali yamadodana akhe, iziphrofetho ezinengi ngaye, lembali yokwakhiwa kutsha kwethempeli likaNkulunkulu kulotshiwe egwaleni lwezindaba zamakhosi. U-Amaziya indodana yakhe waba yinkosi esikhundleni sakhe.